DP BBM PANTUN

Beli batik di pekalongan

Beli Tiga jangan serupa

Neng cantik yang pake kudungan

Boleh tau kaga namanya siapa

Kali Semanan udeh banyak limbah

Banyak buaye yang pade musnah

Biar jaman terus berubah

Tapi budaye kaga boleh punah!

Burung Jalak burung Gelatik

Di atas genteng terbang melayang

Biarpun banyak wanita cantik

Tapi tetep Neng yang Abang sayang

Gunung Sindur pasirnya kuning

Metik capi ampe sebuntelan

Bangun tidur kepala pening

Nyeduh kopi biar kentelan

          Pantun Palang Pintu

Berikut adalah drama satu babak pantun seni Palang Pintu yang biasa kami bawakan. disini TR adalah Tuan Rumah atau jawara mempelai wanita, TM adalah Tamu atau jawara mempelai pria.

TR:       Berenti berenti berenti!!!
TM:       Eh bang, orang lagi jalan lu suruh berenti, emang disini ade lampu merah??
TR:       Elu kaga liat juragan gua lagi bikin hajat?? Pade berisik aja lu!!
TM:       Lah aye ngeliat bang, emang aye pengen kesitu!
TR:       Ampas kelape taro di nampan!
TM:       Beli jamu taro dalem selampe!
TR:       Elu Siape pade di depan?
TM:       Ini tetamu baru pada nyampe!! Assalaamu'alaikum..

TR:       Wa'alaikum salaam (dengan nada sewot)

TM:      Begitu amat bang jawabnya, aye salam bae-bae juga.

TR:       Gua lagi kesel!!

Bang makan sekuteng dicampur wedang

Dengerin musik sambil makan kerang

Abang rame-rame dateng kaga diundang

Pake berisik lagi dirumah orang

TM:      Owhhh abang marah gara-gara aye pada berisik?

Bang kantong plastik isiin kembang

Yok kite jiareh ke cikaduan

Eh aye emang bikin berisik dirumah abang

Tapi aye punya maksud dan tujuan

TR:       Owwhh jadi lu kesini punya maksud ame tujuan?

TM:       Ya jelas ade bang, emang aye dateng rame-rame kesini mao pada demo??

TR:       Kalo emang mao jiareh ke cikaduan

Mampir pulangnye ke caringin

Kalo emang lu punya maksud dan tujuan

Sudi Kiranye lu bilangin

TM:      Nih bang aye bilangin, dengerin bang!!

Beli bandeng di pejompongan

Burung gereja di puun duri

Eh aye dateng ama rombongan

Nih nganterin tuan raja mao ngelamar tuan putri

TR:       Owhh jadi lu kesini mao ngelamar tuan putri? Anak juragan gua??

TR:       Bisa apa tuan raja lu mao ngelamar putri kesayangan juragan gua? Lu kaga liat siape yang
            jaga?

TM:       Yang aye liat mah hansip yang jaga tadi didepan bang..

TR:       Bang, pisang batu dalemnya busuk

Mending buangin ada uletnya

Nih palang pintu kaga ngijinin lu masuk

Sebelom lu penuhin persyaratannya

TM:       Jadi ada syarat-syaratnya?

TR:       Jelas ada bang!!

TM:      Bang naek kuda ama keretanye

Kuda belang zebra namanye

Kalo emang ada sarat-saratnye

Coba abang bilang apa kiranye

TR:       Kuda belang berpuluh-puluh

Ke rawa tembaga naeknya sampan

Kalo emang abang niat sungguh-sungguh

Aye pengen coba abang punya kemampuan

TM:       Jadi abang pngen nyoba aye punya kemampuan? Kemampuan mane yang mao dicoba? Silahkan bang!!

TR:       Nih lu jatoin jago-jago gua yang lagi pada bediri..

TM:       Owwwhh itu jago bang? Nih aye udah bawain tukang potong jago. Bukan puluhan lagi, tapi 
             ratusan jago udah dipotong ame dia..

TR:       Jawara dia??

TM:       Bukan bang, tapi tukang ayam!!

TR:       itu mah ayam jago!!

Bang, duit jigo tetep jigo

Beli roko dikasih puntung

Jago aye bukan sembarang jago

Jago aye anak buahnye si pitung

TM:      Yang mane anak buahnye si pitung?

TR:       Ini semua!!

TM:      Kok mukanye kaya si Malih?

Bang, kalo beli roko dikasih puntung

Mending jiareh ke gunung sindur

Biar jago abang anak buahnye si pitung

Tapi selangkeh aya kaga bakalan mundur

TR:       Niat juga lu, jadi lu kaga mao mundur??

TM:       Kaga!!

TR:       Kaga mao mundur??

TM:       Kaga dah!!!

TR:       Makan??

TM:       Mao!!!

TR:        Lapar lu!!

TM:       Emang belom nyarap bang tadi

TR:       Udah jangan lama-lama, kalo emang lu maksa mao masuk nih lu lawan jawara-jawara gua..

TM:       Abang keluarin dah yang tukang malangin pintu, nih aye bawain tukang dobraknye..

            Jawara-jawara kedua pihak pun berantem yang akhirnya dimenangkan oleh pihak penganten laki, bukannye ngapa, kalo yang menang pihak perempuan tar gak jadi kawin tuh nganten,hehehe..

TM:       Jago-jago abang udah dikalahin semua ame jago-jago aye, ape tuan raja beserta keluarga dan rombongan udeh boleh masuk ini bang?

TR:       Eeiitt!! Entar dulu!!

TM:       Entar dulu mulu, nunggu apaan lagi??

TR:       Tadi kan lu kata lapar??

Noh ikan gurame elu siangin

Kalo udeh tar gua yang bawa

Sarat pertame boleh udah lu penuhin

Tapi masih ade sarat yang kedua

TM:       jadi masih ada sarat lagi?

TR:       masih ade bang!

Burung dara burung kenari

Rendah terbangnye di puun kranji

Selaen bisa buat jaga diri

Calon mantu juragan aye juga harus bisa ngaji

Itu tuan raja lu bisa ngaji kaga?

TM:       jadi itu sarat yang kedua? Kaga salah bang, nih tuan raja aye umur 2taun aja udah bisa baca patehah bang, umur 5taun udah ngikut mimpin tahlil!

TR:       dia yang mimpin?

TM:       bukan, pak ustad! Dia mah nenteng berkat doank!

Bang, kalo mao motong kelam pake gergaji

Gergajinya kudu ditajemin

Namanya orang islam emang harus bisa ngaji

Nih muridnya ngaji elu dengerin

...Shikah/sikeh pun dibawain..

TR:       Subhanallah, pinter bener muridnya ngaji,,

TM:       Itu baru muridnye yang pertama bang!

TR:       Owhh jadi ada muridnye yang laen?

TM:       Kaga ada bang, dia doank satu-satunya!! Jadi pegimane bang? Apa masih ada sarat lagi?

TR:       Aye kira cukup bang, calon mantu begini yang juragan aye cari..

TM:       Jadi udah boleh masuk?

TR:       Udeh bang..

Kaga puntung kaga bendo

Bajang-bajang di puun kara

Ada untung ada jodo

Kita panjang-panjang sanak sodara

TM:      Kalo begitu bang,

Gunung meletus di medan deli

Asepnya keluar sampe muara

Biar putus aer di kali

Jangan putus kita bersodara

TR:       Ahlan wa sahlan bidhuhurikum!!

TM:       Assalaamu'alaikum

TR:       Wa'alaikum salaam

Penganten laki pun masuk bserta rombongan buat ijab kabul..

DP BBM I LOVE BETAWI